Мемлекет басшысы Қасым-Жомарт Тоқаев Швейцария Президенті Ули Маурермен кеңейтілген келіссөздер барысында екі мемлекет арасындағы екіжақты ынтымақтастықты нығайту мәселелерін талқылады, деп хабарлайды Қазақстан президентінің баспасөз қызметі.
Кездесу басында Қасым-Жомарт Тоқаев Қазақстан мен Швейцария арасындағы екіжақты қарым-қатынастың қалыптасуында Тұңғыш Президент Нұрсұлтан Назарбаевтың рөлін атап өтті.
Келіссөздер аясында екі мемлекеттің Президенттері сауда-экономикалық және инвестициялық ынтымақтастықты жандандыру мәселелерін қарастырып, бірлескен жобаларды жүзеге асыру мәселелерін талқылады.
Қасым-Жомарт Тоқаев Қазақстан Республикасы Швейцарияны өзара іс-қимылды дамыту үшін маңызды серіктес ретінде қарастыратынын атап өтті.
Өз кезегінде, Швейцария басшысы біздің республиканың Орталық Азия өңіріндегі негізгі рөліне назар аударды. Оның айтуынша, біздің мемлекет Еуропа мен Азия арасындағы көпір болып табылады.
“Біз Азия мен Еуропа арасындағы қарым-қатынастарды тікелей талқылап, өзара түсіністікті қамтамасыз ете алатын, континенттер арасындағы экономикалық қатынастарды нығайтуға бірлескен үлес қоса алатын Қазақстан сияқты серіктесіміз болғанына өте қуаныштымыз”, – деді Ули Маурер.
Кездесу соңында Қазақстан Президенті Швейцария басшысының біздің елімізге ресми сапары екі мемлекет арасындағы екіжақты ынтымақтастықты одан әрі дамытуға айтарлықтай серпін беретінін айтты.
