Тәуелсіз Мемлекеттер Достастығына қатысушы елдер, оның ішінде Қазақстан, Қарулы күштері арасында бірыңғай байланыс жүйесін құра алады. Бұл туралы militarynews.ru жаңалықтар арнасы жазады.
Сөз Достастыққа қатысушы елдерде осындай байланыс жүйесін құруды көздейтін келісім туралы болып отыр.
Құжатта бірлескен байланыс жүйесі ТМД-ға қатысушы елдердің Қарулы Күштері арасындағы өзара іс-қимылды дамытуға ықпал етеді делінген.
Келісімде айтылғандай, бірыңғай әскери байланыс жүйесі бойынша жұмысты Ресей Федерациясы Қарулы Күштері байланыс Бас басқармасының басшысы үйлестіретін болады.
Ресей үкіметінің басшысы Михаил Мишустин ТМД елдері Қарулы Күштерінің бірыңғай байланыс жүйесін құру жобасын мақұлдады.
«Тәуелсіз Мемлекеттер Достастығы үкімет басшылары кеңесінің отырысында осы өкімде көзделген келісімге қол қою орынды деп саналсын», — делінген Ресей премьер-министрінің өкімінде.
Сурет: azertag.kz
