Палата Спикері Нұрлан Нығматулиннің төрағалығымен өткен ҚР Парламенті Мәжілісінің пленарлық отырысында депутаттар “Тәуелсіз Мемлекеттер Достастығына қатысушы елдердің бас бостандығынан айырумен байланысты емес жазаларды өтеу туралы конвенциясын ратификациялау туралы” заң жобасын мақұлдады.
Ішкі істер министрі Ерлан Тұрғымбаев конвенцияның негізгі мақсаты — әрбір азаматқа өз жазасын тұрғылықты жері бойынша өтеуге мүмкіндік беру екенін атап өтті.
“Конвенцияға сәйкес сотталған адам немесе оның заңды өкілі тұрғылықты жері бойынша жазасын өтеу туралы өтініш береді. Өтінішхат негізінде Бас прокуратура сұрау жібереді, сұрауға азаматтығын куәландыратын құжаттар, оның жазбаша келісімі, сот шешімінің көшірмесі, мінездеме, залалдар туралы мәліметтер қоса беріледі. Сотталған адамды қабылдайтын жақ жазаны белгіленген жазадан қатаң жаза қолданбауы керек”, – деді ол.
Ведомство басшысының айтуынша, қабылданған шешім туралы хабарлаған кезден бастап сотталған адам 45 күннен кешіктірмей мемлекет аумағынан кетуге міндетті. Осы талап орындалмаған жағдайда ол сол елден шығарылады.
Сұранысты қанағаттандырудан бас тартудың негіздері қарастырылған. Бұл әрекет жазаны өтеу мемлекетінде, мерзімінің өтуі салдарынан, егемендікке, ұлттық қауіпсіздікке, ұлттық заңнамаға қайшы келетін қылмыс болып табылмайды”, – деді Ішкі істер министрі Ерлан Тұрғымбаев.
Оның мәліметінше, қазір Қазақстанда пробация қызметінің есебінде 447 шетелдік азамат тұр, оның ішінде Өзбекстан — 216, Ресей — 138, Қырғызстан — 38, Армения — 5. Басқа елдерде Қазақстан Республикасының 280 азаматы бас бостандығынан айырылуына байланысты емес жазасын өтеуде, оның ішінде Ресейде — 251, Өзбекстанда — 24, Қырғызстан мен Беларусьте — 2.
Сурет: zakon.kz
