Біздің республикамыздың делегациясы сараптама тобының отырысына қатысты, оның барысында 2021-2025 жылдарға арналған ТМД елдерінің гидрометеорологиялық қызметін дамыту стратегиясын іске асыру мәселелері қаралды. Бұл туралы Достастықтың Атқарушы комитетінің баспасөз қызметі хабарлайды.
Минскіде өткен отырысқа қатысушылардың арасында Қазақстаннан ғана емес, Беларусь, Ресей, Тәжікстан, Өзбекстан, сондай-ақ ТМД Атқару комитетінің өкілдері болды.
Сарапшылар тобының кездесуінде Достастыққа мүше мемлекеттердің гидрометеорологиялық қызметін дамыту стратегиясын іске асыруға бағытталған іс-шаралар жоспарына ерекше назар аударылды.
Сондай-ақ, отырыс барысында қатысушыларға бұл жоспарды Армения, Беларусь, Қазақстан, Қырғызстан, Ресей, Тәжікстан және Өзбекстан сарапшыларының қатысуымен ТМД Гидрометеорология жөніндегі Мемлекетаралық Кеңес әзірлегені туралы ақпарат берілді.
Бұл жоспардың басты ерекшелігі — Тәуелсіз Мемлекеттер Достастығы елдері арасында гидрометеорология саласындағы ынтымақтастықты одан әрі нығайтуға ықпал ететіндігінде.
