Мәскеуде халықаралық әскери орталықта өтіп жатқан консультативтік кездесулер аясында Тәуелсіз Мемлекеттер Достастығына қатысушы елдер арасындағы көпжақты әскери ынтымақтастық мәселелерін талқылауға арналған кеңес өтті, деп хабарлайды Ресей Федерациясы қорғаныс ведомствосының баспасөз қызметі.
Кеңеске Қазақстан, Ресей, Беларусь, Қырғызстан, Әзірбайжан, Армения, Тәжікстан және Өзбекстан Қарулы Күштерінің өкілдері қатысты.
Әскери ынтымақтастықты талқылай отырып, пікірталасқа қатысушылар биылғы жылдың бірінші жартыжылдығында COVID-19 індетіне байланысты бірлескен іс-шараларды өткізу мерзімдерін қайта қарау қажеттігі туындағанын атап өтті.
Дегенмен, ТМД мемлекеттерінің қорғаныс ведомстволарының өзара тығыз байланыстарының арқасында туындаған мәселелер бойынша қажетті шешімдер қабылданды.
Кеңес барысында Достастық мемлекеттері Қарулы Күштерінің өкілдері ТМД елдері арасындағы әуе шабуылына қарсы қорғаныс саласындағы өзара іс-қимылды одан әрі дамыту мәселелерін талқылады.
Әскери білім беру мен әскери қызметкерлерді даярлау салаларындағы өзара іс-қимылды кеңейту және әскери-гуманитарлық ынтымақтастықты дамыту бойынша алдағы әрекеттер талқыланды.
Сурет: sputniknews.kz
