Тәуелсіз Мемлекеттер Достастығы елдерінің судьялары ТМД-да жоғарғы соттар төрағаларының кеңесін құруды ұсынды. Мұндай бастама ТМД-дағы экономика саласындағы даулар бойынша істерді шешетін Жоғары төрелік, шаруашылық, экономикалық және өзге де соттардың төрағалары кеңесі мүшелерінің өткен 14-ші отырысында айтылды. Бұл туралы Ресей Жоғарғы сотының баспасөз бөлімінде айтылды.
Отырысқа бейнеконференция режимінде Достастық елдері Атқарушы комитеті, Қазақстан Республикасы, Қырғызстан, Ресей Федерациясы Жоғарғы соттары, Тәжікстан Республикасы Жоғары экономикалық соты, сондай-ақ Армения кассациялық соты делегациясының мүшелері қатысты.
Ресей Жоғарғы сотының басшысы Вячеслав Лебедевтің айтуынша, қазіргі уақытта Достастыққа қатысушы елдер арасындағы сот төрелігі саласындағы ынтымақтастықты одан әрі кеңейту үшін үлкен әлеует жинақталған. Сондай-ақ, ол ТМД-ға мүше мемлекеттердің жоғарғы соттар төрағаларының кеңесін құру туралы бастаманы қолдады.
Лебедев атап өткендей, жаңа мемлекетаралық орган құру туралы келісім жобасы ТМД жарғысында көзделген мақсаттарға, міндеттерге және қағидаттарға сәйкес келеді. Жобаны іске асырудың арқасында Достастыққа қатысушы елдердің жоғары соттары арасындағы өзара іс-қимылдың тиімділігі артады.
Бұдан басқа, кеңестің құрылуы азаматтық, әкімшілік, төрелік және қылмыстық сот ісін жүргізуді жаңғырту саласында ТМД-ға мүше елдер арасында тәжірибе алмасудың тиімділігін жақсартады, сондай-ақ Сот төрелігі саласындағы әріптестікті кеңейтуге ықпал ететін болады.
Сурет: m.in-news.ru
