Тәуелсіз Мемлекеттер Достастығына қатысушы мемлекеттер қарулы күштері бас штабтарының бастықтары Орталық Азия өңіріндегі ағымдағы әскери-саяси жағдайды талқылады. Бұл туралы Ресей Федерациясы Қарулы Күштері бас штабының бастығы, Ресей Қорғаныс министрінің бірінші орынбасары, армия генералы Валерий Герасимов хабарлады.
“Отырыс барысында аймақтағы қалыптасқан әскери-саяси жағдай жөнінде пікір алмасып, ТМД елдерінің қауіпсіздігіне төнетін қауіп-қатерлерге талдау жасалды”, – деді Ресей бас штабының бастығы.
Герасимов отырыста терроризмге қарсы бірлескен оқу-жаттығулар өткізу мәселелерін қарастырғанын атап өтті.
Отырысқа қатысушылар Лаос Республикасында гуманитарлық минасыздандыру және ұшқышсыз ұшу аппараттарының шабуылына қарсы тұру схемасымен танысты.
“Отырыс барысында қорғаныс және қауіпсіздік саласындағы өзара іс-қимылды одан әрі дамытуға бағытталған басқа да мәселелер қаралды”, – деп атап өтті Валерий Герасимов.
Ол бас штабтар бастықтары комитетінің отырысында ТМД елдерінің ұлттық мүдделерінің сәйкестігін және жоғары даму қарқынын атап өтті.
Сурет: Function.mil.ru
