Тәуелсіз Мемлекеттер Достастығынан бақылаушылар миссиясының Қазақстан Республикасы Мәжілісі депутаттарының сайлауына мониторинг жүргізу жұмысы жалғасуда. Бұл туралы ТМД Байқаушылар миссиясы штабының баспасөз қызметі хабарлады.
Жақында ТМД-дан келген ұзақ мерзімді бақылаушылар Ақмола және Қарағанды облыстарындағы парламенттік сайлауға дайындықпен танысты. Миссия штабының мүшелері Ақмола және Қарағанды облыстық сайлау комиссияларының басшылығымен кездесулер өткізді, Көкшетау және Қарағанды қалаларындағы бірқатар учаскелік сайлау комиссияларына барды.
Достастықтың бақылаушылары комиссия мүшелерінің кәсібилігін, дауыс беруге арналған үй-жайларда сайлау комиссияларының мүшелері үшін де, сайлаушылар үшін де қажетті жабдықтардың, ақпараттық материалдардың, сондай-ақ қорғаныс құралдарының (бетперде, қолғап) болуын атап өтеді.
Бейнеконференцбайланыс режимінде ТМД атынан ұзақ мерзімді бақылаушылардың Қазақстан Республикасы Бас прокуратурасының басшылығымен кездесуі өтті, оның барысында сайлау науқанына барлық қатысушылардың сайлау заңнамасын сақтауын қамтамасыз етудегі Республика прокуратура органдарының рөліне байланысты мәселелер талқыланды. Сондай-ақ, Миссия мүшелеріне Бас прокуратураға келіп түскен азаматтардың өтініштері және оларды қарау нәтижелері туралы ақпарат берілді.
ТМД бақылаушылары миссиясының құрамын қалыптастыру аяқталды. Орталық сайлау комиссиясы Достастық елдерін, ТМД мемлекеттерінің Парламентаралық Ассамблеясын, Беларусь және Ресей Одағының Парламенттік жиналысын, ҰҚШҰ Парламенттік Ассамблеясын, ТМД Атқарушы комитетін білдіретін 234 байқаушыны аккредиттеді.
Сурет: amp.akcenty.com.ua
