Ағымдағы жылдың күзінде ТМД-ға қатысушы елдердің «Арарат-Антитеррор-2019» лаңкестікке қарсы оқу-жаттығулары өтеді. Бұл туралы ТМД лаңкестікке қарсы орталығының (ЛҚО) баспасөз қызметі хабарлады.
Терроризмге қарсы оқу-жаттығуларға Армения, Беларусь, Қазақстан, Қырғызстан, Ресей, Тәжікстан және Өзбекстан қауіпсіздік органдары мен арнайы қызметтері қатысады.
Бүгінгі таңда ТМД-ға қатысушы елдердің бірлескен оқу-жаттығуына дайындық аясында Губкин атындағы Ресей мемлекеттік мұнай және газ университетінің отын-энергетикалық кешенінің кешенді қауіпсіздік факультетінің базасында нұсқаулық-әдістемелік сабақ өтті.
Нұсқаулық-әдістемелік сабаққа ТМД-ға қатысушы елдердің қауіпсіздік органдары мен арнайы қызметтерінің өкілдері қатысты. Іс-шара барысында ТМД ЛҚО сарапшылары қатысушыларды жетекші мұнай-газ компанияларын қорғауға арналған арсеналмен таныстырды, сондай-ақ аса маңызды объектілердің осал жерлерін компьютерлік модельдеу және террористік қауіптілікті көрсету нұсқаларын көрсетті.
ТМД ЛҚО басшысы Андрей Новиков егер отын-энергетикалық кешеннің маңызды объектілері бүлініп, жұмыс істемей қалса — бұл елдердің ұлттық қауіпсіздігіне потенциалды қауіп төндіретінін айтты.
