Ұлттық статистика бюросы Қазақстаннан көші-қон бойынша 2020 жылғы деректерін жариялады. Дерекке сәйкес, өткен жылы республикадан 29 мыңнан астам адам кеткен. Ал, елімізде 11 мыңнан астам мигрант қоныс тепті.
2019 жылмен салыстырғанда біздің мемлекеттен қоныс аударушылар саны 35,6%-ға азайды. Сарапшылардың пікірінше, бұл коронавирус індеті аясындағы карантиндік шектеулерге байланысты.
Өңірлер арасында Қазақстаннан кетушілердің ең көп көрсеткіші Қарағанды облысында байқалады — 4106 адам. Одан кейін Шығыс Қазақстан облысы — 3868 адам. Көшбасшылар үштігінің соңында Қостанай — 3347 адам. Мигранттардың ең азы Қызылорда облысы — 53 адам.
2020 жылы Отанынан кеткен 8 мыңнан астам қазақстандықтың жоғары білімі бар. Кәсіптік орта білімді- 7417, жалпы орта білімді- 4334, ал негізгі орта білімді -1746.
Сонымен қатар, өткен жылы Қазақстаннан кеткен 4471 адамның техникалық мамандығы, 2332 — экономикалық, 1454 — педагогикалық, 759 — медициналық, 541 — заңгерлік мамандықтары бар.
Бірқатар сарапшылардың пікірінше, азаматтардың біздің елден кетуінің негізгі себептерінің бірі — әлеуметтік лифттің жоқтығы, жалақының төмендігі және білім беру жүйесінің құлдырауы.
