Ақорда ғимаратының жанында Қазақстан Республикасында тіркелмеген Демократиялық партияның көшбасшысы Жанболат Мамай бастаған бір топ азаматтар жиналды.
Мамайдың айтуынша, ол өзінің жақтастарымен бірге Президент әкімшілігіне несие амнистиясы туралы талап хат пен жүз мыңға жуық өтініш беру үшін Ақордаға келді.
Демпартия басшысының айтуынша, біздің елдің басшылығы коронавирустық індетпен күресудің қиын кезеңінде азаматтарды қолдау үшін несиелік рақымшылық жариялауы керек.
“5,3 миллион адамның несиесін кешіріп, халықты қолдау керек. Біз елде бұл мақсатқа ақша жоқ деген сылтауларға сенбейміз”, – деді Мамай.
Ақорда жанында жиналған азаматтармен Президент әкімшілігінің өтініштерді қарауды бақылау бөлімі меңгерушісінің орынбасары Данияр Қадыров кездесіп, оларға өтініштермен Министрлік үйіндегі азаматтарды қабылдау кабинетіне жүгінуге болатынын айтты.
Сол кабинетке барғаннан кейін, Жанболат Мамай несие амнистиясы бойынша барлық өтініштер қабылданғанын айтты.
Сурет: sputniknews.kz
