Қазақстан Экология министрлігінің басшысы Мағзұм Мырзағалиев «АрселорМиттал Теміртау» басшылығынан атмосфераға ластаушы заттардың шығарылуын азайту үшін кәсіпорынды жаңартуды талап етті. Бұл туралы Kazakhstan Today хабарлайды.
Оның айтуынша, жылына «Арселор Миттал Теміртау» АҚ металлургиялық кәсіпорнынан атмосфералық ауаға 200 мың тоннадан астам ластаушы заттар шығарылады, бұл әр қала тұрғынына шамамен 11 тонна зиянды заттар. Сонымен қатар, ол кәсіпорынның табиғатты қорғауға бағытталған іс-шараларының тиімділігі аз екенін атап өтті.
«Кәсіпорында тиімділігі төмен табиғатты қорғау шаралары енгізілген, олар тек қағаз жүзінде және жалған есепте көрсетілген», — деп атап өтті Экология министрлігінің басшысы
Ол өткен 5 жыл ішінде металлургия кешені табиғатты қорғау шараларына 30 миллион теңге жұмсағанын, алайда атмосфераға шығарындылар тек 0,08%-ға қысқарғанын айтты. 2019 жылы кәсіпорын 2024 жылға дейін шығарындылар санын 60 тоннаға дейін азайтуға міндет алды.
«Алайда, кәсіпорын әлі күнге дейін өзіне алған міндеттемелерді орындау бойынша шаралар қабылдап жатқан жоқ», — деп атап өтті министр.
Мырзағалиев компания басшылығының алдына шығарындылар санын алдағы 4 жылда кемінде 30%-ға төмендетуді қамтамасыз ету үшін ауқымды қайта құру, жаңа технологияларға көшу, өндірісті жетілдіру міндетін қойды.
Сурет: skyscapercity.com
