Нью-Йорктегі БҰҰ-ның штаб-пәтерінде теңізге шыға алмайтын дамушы елдер тобына төрағалық етуді біздің республикаға тапсыру рәсімі өтті, деп хабарлайды Қазақстан СІМ баспасөз қызметі.
Қазақстан дипломатиялық өкілдерінің айтуынша, шараға теңізге шыға алмайтын дамушы елдер тобына мүше елдердің елшілері мен сарапшылары қатысты.
БҰҰ штаб-пәтерінде өткен рәсім барысында Қазақстан төраға лауазымында теңізге шыға алмайтын дамушы елдер үшін Веналық іс-қимыл бағдарламасын іске асыруға жәрдем көрсетуді жоспарлап отырғаны айтылды.
Іс-шараға қатысушылар алдында сөйлеген сөзінде біздің еліміздің БҰҰ жанындағы Тұрақты Өкілі Қайрат Омаров Қазақстан Республикасы төраға лауазымында теңізге шыға алмайтын дамушы елдер тобына мүше мемлекеттер арасындағы ынтымақтастықты дамытуға белсенді жәрдемдесетін болады деп мәлімдеді.
Бүгінгі таңда теңізге шыға алмайтын дамушы елдер тобының құрамына 32 мемлекет, Қазақстанды қоса алғанда, Орталық Азия өңірінің барлық елдері кіреді.
Сурет: inform.kz
