«Теңізшевройл» компаниясының үкіметпен және жұртшылықпен байланыс бөлімінің бас менеджері Рзабек Артығалиев коронавирустық инфекция өршіген Теңіздегі жағдай туралы хабарлады, деп жазады today.kz жаңалықтар ресурсы.
Оның айтуынша, қазір Теңіз кен орнында компания мен мердігерлік ұйымдардың қызметкерлерін демобилизациялау жұмыстары жүргізілуде. Сонымен қатар, ол 18,5 мыңнан астам адам Теңізден кеткенін атап өтті.
Сондай-ақ, «Теңізшевройл» өкілі компанияда карантиндік шараларға байланысты жұмысқа шыға алмаған вахталық қызметкерлердің жалақысын толығымен сақтап қалу туралы шешім қабылданғанын айтты.
Рзабек Артығалиев қазір кен орнында жұмыс істеп жатқан жұмысшыларға жалақы бір жарым есе мөлшерде есептелетінін қоса айтты.
Сонымен қатар, қазір Теңізде коронавирустың жеңіл және симптомсыз түрлерімен науқастанғандарды жатқызатын жұқпалы аурулар стационары жұмыс істейді. Қазіргі уақытта онда 376 адам емделуде.
Атырау облысында ресми түрде COVID-19 ауруының 891 жағдайы тіркелді,бұл ретте коронавирус жұқтырған азаматтардың көпшілігі Теңіз кен орнының қызметкерлері болып табылады.
Сурет: zakon.kz
