Ақмолалық полицейлер «Қазақалтын» тау-кен металлургия комбинатының шотынан 1,5 миллиард теңге ұрлады деп күдікке ілінгендерді ұстады, деп хабарлайды Sputnik Қазақстан.
Естеріңізге сала кетейік, компания өкілдері полицияға «Қазақалтын» тау-кен металлургия комбинатының шотынан ірі ақша ұрланғанын 23 ақпанда хабарлаған болатын.
Күдіктілер комбинаттың қаржы бөлімінің 37 жастағы қызметкері және оның азаматтық жұбайы болды.
«Қылмыстық кодекстің 189-бабының 4-бөлігі (аса ірі мөлшерде сеніп тапсырылған бөтен мүлікті иемдену немесе ысырап ету) бойынша сотқа дейінгі тергеу басталды. Осы баптың санкциясы жеті жылдан он екі жылға дейінгі мерзімге бас бостандығынан айыру түріндегі жазаны көздейді», — деп хабарлады Ақмола облысы полиция департаментінің баспасөз қызметінің басшысы Гүлнар Пинчук.
Күдіктілер сот анықтаған бұлтартпау шарасы бойынша қамауға алынды, деп қоса айтты Пинчук.
Сондай-ақ тергеу органы тергеу шеңберінде залалды өтеуді қамтамасыз ету шараларын қолданады.
«Тергеу мүддесіндегі басқа ақпарат жариялауға жатпайды», — деп қорытындылады ведомствоның баспасөз қызметінің басшысы.Бұдан бұрынырақ, 22 ақпанда, «Қазақалтын» шотынан 1 533 000 000 теңге (3,6 миллион доллардан астам) заңсыз аударылғаны хабарланған болатын.
