Татарстан Көлік және жол шаруашылығы министрлігінің басшысы Ленар Сафин қазақстандық авиакомпаниялар Қазанға тура әуе рейстерін жүзеге асыратынын айтты. Бұл туралы Ресейдегі Қазақстан елшілігінің баспасөз қызметі хабарлады.
Министрдің айтуынша, бүгінгі таңда Қазан қаласынан Нұр-Сұлтан мен Алматыға тура әуе қатынасын ашу бойынша келіссөздер жүргізілуде. Сонымен қатар, ол әуе рейстерін қазақстандық әуе компаниялары – FlyArystan және Air Astana орындайтын болады деп атап өтті.
Сонымен қатар, Ленар Сафин Қазан мен Мюнхен, Тель-Авив және Ереван арасында тікелей авиарейстерді іске қосу мәселесі қарастырылып жатқанын мәлімдеді.
Татарстан Көлік министрлігінің басшысы субсидиялау бағдарламасы бойынша аймақтық әуе тасымалдарының қол жетімділігін қамтамасыз ету мәселелеріне де назар аударылып отырғанын атап өтті.
Бауырлас Ресей мемлекетіндегі Қазақстан елшілігінің ақпараты бойынша, қазіргі уақытта Қазан мен Қазақстан астаналары арасында тікелей әуе рейстері жоқ.
