Тараз қаласының санитарлық-эпидемиологиялық станциясының бастығы жалған аудиторлық есеп беруге күдікті болып отыр. Бұл туралы сыбайлас жемқорлыққа қарсы ведомствоның баспасөз қызметі хабарлады.
“Жамбыл облысының сыбайлас жемқорлыққа қарсы қызметі Тараз қалалық тауарлар мен қызметтердің сапасы мен қауіпсіздігін бақылау басқармасының басшысына қатысты қылмыстық істі тергеуде, ол 2019 жылдың сәуір айынан шілде айына дейін үлестес компания арқылы 85 шаруашылық жүргізуші субъектілерге олардың объектілерінің санитарлық-эпидемиологиялық ережелерге сәйкестігі туралы жалған аудиторлық есеп берді (есептерді сот жарамсыз деп таныған). Осы тұлғаның келтірген шығыны 7 миллион теңгеден асады”, – делінген хабарламада.
Бұрын аталған азамат жеке компанияға санитарлық-эпидемиологиялық оң қорытынды бергені үшін 100 мың теңге көлемінде пара алғаны және лауазымдық өкілеттігін асыра пайдаланғаны үшін бас күдікті болған.
Сондай-ақ бұл лауазымды адам кәсіпкерлік қызметке заңсыз қатысуға күдікті.
«Күдіктіге қатысты сот үйде қамауда ұстау түріндегі бұлтартпау шарасын таңдады», – делінген хабарламада.
