Десанттық-шабуылдау әскерлерінің болашақ жауынгерлері оқу-әдістемелік жиындар шеңберінде жауынгерлік даярлықтың бастапқы кезеңінің ең күрделі жаттығуларының бірін орындады. Бұл туралы “Қазақпарат” ақпарат агенттігі хабарлады.
Жаттығудың мән-мағынасы – жертасадан танкке қол гранатасын лақтыру. Ал, 40 тонналық жауынгерлік машина әскери қызметшілердің үстінен өтеді.
Гвардияның оқу бойынша
жетекшісі майор Асқар Мұхиттың айтуынша, мұндай жаттығулар жаңадан қабылданғандарға жауынгерлік машиналардан қорқу сезімін жеңуге мүмкіндік береді.
Сондай-ақ, жауынгерлік дайындықтың бастапқы кезеңінде көктемде шақырылған жас десантшылар АК-74 автоматынан оқ атты. Ең үздік нәтижені Талдықорған гуманитарлық-техникалық колледжін үздік бітірген қатардағы жауынгер Ілияс Саметов көрсетті.
Сарбаз екі күн ішінде қарудан ату кезіндегі көздеу принциптерін меңгергенін, сондай-ақ, бұдан әрі де Отанға лайықты қызмет етуге тырысатынын айтты.
Қазақстан Қорғаныс министрлігінің ақпаратына сәйкес, COVID-19 індетіне қарамастан, республика армиясында жауынгерлік оқу бекітілген кестелер мен жоспарларға сәйкес жүргізілуде.
