Бүгін “Алабино” оқу-тактикалық кешенінің аумағында “Танк биатлонының” кезекті жеке жарысы өтті, онда Қазақстанның танк командасының үшінші экипажы Ресей, Қырғызстан және Өзбекстаннан келген әріптестерімен жарысты.
Біздің әскери қызметшілер, қарсыластары сияқты, Т-72 танкісінде өнер көрсетті. Жеке жарыстың нәтижесі бойынша қазақстандық команда екінші орынға сенімді ие болды.
Жарыста Ресей Федерациясы тағы да алда болды. Үшінші орында Өзбекстаннан келген танкистер. Төртінші орын Қырғызстаннан келген әскери қызметшілерге бұйырды.
Сонымен қатар, алдыңғы екі “Танк биатлоны” жарысында да Қазақстан Республикасының әскери қызметшілері ресейлік әріптестеріне жол беріп, екінші орынға ие болған.
“Танк биатлоны” халықаралық әскери ойындардың ең қызықты байқауы болып саналады. Бұл жарыс дәстүрлі түрде Мәскеу облысында орналасқан “Алабино” Ресей полигонының аумағында өтеді.
Биыл “АрМИ-2020” ұйымдастырушылары танкистер үшін жауынгерлік машинаны жүргізуде жоғары шеберлігі қажет ететін қиын жол дайындады. Дегенмен, қазақстандық әскери қызметшілер барлық кедергілерді еңсеріп, өте жақсы нәтижелер көрсете алды.
Сурет: kp.ru
