Тұңғыш Президент-Елбасы Қоры делегациясы Ұлыбританияға ресми сапары аясында Британ кеңесінің, Кембридж университетінің ғылым және білім беру орталықтарының,Қазақстан-Британ қоғамының басшылықтарымен, сондай-ақ лордтар Палатасының мүшелерімен бірқатар кездесулер өткізді.
Жоғарыда көрсетілген кездесулер барысында Тұңғыш Президент Қорының атқарушы директоры Әсет Исекешев британдықтарға Нұрсұлтан Назарбаевтың екі бастамасын іске қосу туралы айтты. Оның айтуынша, біріншісі – “Ел үміті” – дарынды балалар мен жастарды анықтауға және қолдауға бағытталған жүйе. Елбасының екінші бастамасы – мүмкіндігі шектеулі балаларға қолдау көрсетуге бағытталған “Қамқорлық” бастамасы болып табылады.
Сондай-ақ, Британияға ресми сапары аясында Тұңғыш Президент Қорының делегаттары Кембридж университетімен білім беру саласындағы ынтымақтастық туралы меморандумға қол қойды. Бұдан басқа, тараптар бірлескен бағдарламалар мен ғылыми зерттеулерді жүзеге асыру туралы келісті.
Кембридж университетінің құрметті профессоры Николас Рэй 20 жыл бойы жұмыс істеп келе жатқан Кембридж Орталық Азия форумы атынан қазақстандық делегацияны қарсы алуға қуанышты екенін айтты.
“Біз мультидисциплинарлық ЖОО. Тек ғылыммен ғана емес, сонымен қатар даму саласындағы зерттеулермен де айналысамыз. Сондықтан барлық бағыттар бойынша ынтымақтасуға қуаныштымыз”, – деді Николас Рэй.
