Қазақстанның Тұңғыш Президенті-Елбасы Қорының делегациясы Ұлыбритания астанасында бірқатар кездесулер өткізді.Кездесуде қор жобаларын іске асыру аясындағы ынтымақтастық мәселелері қаралды.
Атап айтқанда, Тұңғыш Президент Қорының делегациясы Британ кеңесінің, Кембридж университетінің ғылыми және білім беру орталықтарының, Қазақстан-Британ қоғамының басшылығымен, Лордтар палатасының мүшелерімен, сондай-ақ Лондонда білім алып жатқан отандық докторанттармен және студенттермен кездесулер өткізді.
Тұңғыш Президент Қорының атқарушы директоры Әсет Исекешев Британ тарапына Елбасының екі жаңа бастамаларын іске қосу туралы айтты. Біріншісі-«Ел үміті». Оның айтуынша, бұл дарынды балалар мен жастарды анықтауға және қолдауға бағытталған жүйе. Елбасының екінші бастамасы мүмкіндігі шектеулі балаларға қолдау көрсетуге бағытталған «Қамқор» жүйесі болып табылады.
Кездесу барысында Тұңғыш Президент – Елбасы Қоры мен Кембридж университеті арасында ынтымақтастық туралы меморандумға қол қойылды. Сонымен қатар, білім беру бағдарламалары мен ғылыми зерттеулерді жүзеге асыру туралы келісімге қол жеткізілді.
