Қазақстанның ішкі істер министрлігі жанындағы тергеу департаментінің бастығы Санжар Әділов үлестік құрылыстағы алаяқтық фактісі бойынша қылмыстық істерді тергеу барысы туралы айтты, деп хабарлайды vestikavkaza.ru ақпарат агенттігі.
ІІМ өкілі қазір Қазақстанда үлестік құрылыстағы алаяқтық фактісі бойынша ашылған 27 қылмыстық іс тергеліп жатқанын хабарлады.
Олардың бірі Expo New Life астаналық тұрғын үй кешені үлескерлерінің өтініші бойынша “Шанг Хи Групп” ЖШС-ға қатысты басталды. Залал сомасы – екі миллиард теңгеден астам.
Нұр-Сұлтанда “Шығыс” тұрғын үй кешенінің құрылыс салушысына қатысты тағы бір іс ашылды, оның алаяқтық әрекеттерінің салдарынан 24 адам зардап шекті. Шығын сомасы алдын ала болжағанда 184 миллион теңгеден асады.
Санжар Әділов үлестік құрылыстағы алаяқтық фактісі бойынша қозғалған барлық қылмыстық істер бойынша 305 адам жәбірленуші болып танылғанын, ал келтірілген залалдың жалпы сомасы – 3,2 миллиард теңгеден астам екенін атап өтті.
Тергеу департаментінің бастығы үлестік құрылысқа байланысты барлық қылмыстық істер біздің мемлекетіміздің құқық қорғау ведомствосының ерекше бақылауында екенін атап өтті.
Сурет: liter.kz
