Түркияда жер сілкінісі болды, оның салдарынан адамдар қаза тауып, зардап шекті. Осыған байланысты мемлекет басшысы Қасым-Жомарт Тоқаев түрік әріптесі Режеп Ердоғанға көңіл айту жеделхатын жолдады. Бұл туралы Ақорданың баспасөз қызметі хабарлады.
Өз жеделхатында Қасым-Жомарт Тоқаев Түрік Республикасындағы табиғи апат салдарынан көптеген зардап шеккендер мен құрбандар туралы ақпаратты терең күйзеліспен қабылдағанын жазды.
Сондай-ақ, Түркия басшысына Қазақстан Республикасының Тұңғыш Президенті Нұрсұлтан Назарбаев көңіл айту жеделхатын жолдады, онда ол қаза тапқандардың туыстарына және бүкіл түрік халқына көңіл айтты. Сонымен қатар, Елбасы зардап шеккендердің барлығына тез арада сауығып кетуін тіледі.
Ағымдағы жылдың 24 қаңтарында Түрік Республикасының шығысында магнитудасы 6,8 балл жер сілкінісі болды. Табиғи апат салдарынан 20-дан астам адам қаза тауып, мыңнан астам адам жарақат алды.
Бұған дейін Қазақстан сыртқы саясат ведомствосының өкілі Айбек Смадияров Түркияда жер сілкінісі кезінде зардап шеккендер арасында Қазақстан азаматтары жоқ деп мәлімдеді.
