Түркістан-Самарқанд халықаралық автобус бағыты ашылды. Жолаушылар автобустары күн сайын Түркістан “Алтын орда” стансасынан және Самарқанд автобус вокзалынан сағат 18-де жөнелтіледі, деп хабарлайды Түркістан облысы әкімінің баспасөз қызметі.
Билет 4000 теңге тұрады. Автобус Шымкент, Гүлстан және Джизакқа тоқтайды. Жаңа маршруттың ашылуы туристер ағынын арттырады,жаңа туристік маршруттардың қалыптасуына, Түркістан мен Самарқанд арасындағы сауда-экономикалық ынтымақтастықты нығайтуға және екі қаланың сауда-экономикалық, туристік әлеуетін нығайтуға ықпал етеді.
Түркістан облысында 44 тасымалдаушы 1224 автобус пен шағын автобуста жолаушылар тасымалы жүзеге асырылады. Облыста тұрақты маршруттар желісі 325 бағыттағы 1090 кестеден тұрады. Облыс бойынша өткен жылы 797 миллион жолаушы тасымалданған. Бұл көрсеткіш өткен жылдың деңгейінен 1,8 пайызға артты.
Сурет: Казинформ
