Түркістан облысы әкімінің орынбасары Ұлан Тәжібаев пен сыбайлас жемқорлыққа қарсы іс-қимыл агенттігінің Түркістан облысы бойынша департаментінің басшысы Хакім Көшқалиевтің төрағалығымен Білім беру саласындағы сыбайлас жемқорлықтың алдын алу жөніндегі мемлекеттік органдардың бірлескен отырысы өтті. Бұл туралы “ҚазАқпарат” ХАА, Түркістан облысы әкімдігінің баспасөз қызметіне сілтеме жасай отыра хабарлайды.
Кездесуге облыстық төтенше жағдайлар, полиция, тауарлар мен қызметтердің сапасы мен қауіпсіздігін бақылау департаменттерінің басшылары, облыстық адами әлеуетті дамыту басқармасының басшысы Рахымбек Жолаев және білім беру мекемелерінің басшылары қатысты.
Отырыста өткен жылы Агенттіктің тәулік бойғы call-орталығына 1424 нөміріне облыс тұрғындарынан білім беру саласына 21 шағым түскені атап өтілді. Ең жиі білім беру мекемелерінің қажеттіліктеріне, антисептиктерді сатып алуға, сонымен қатар дипломдар мен сертификаттар алуға, мемлекеттік сатып алуларға, аттестациялар мен олимпиадаларға байланысты өтініштер болды. Сондай-ақ, кеңеске қатысушылар санитарлық нормаларды, мектептердегі өрт қауіпсіздігін сақтау бойынша тексерулер негізінде мектеп директорларына салынған айыппұлдардың мөлшері сыбайлас жемқорлыққа әкелуі мүмкін екенін атап өтті. Олардың кейбіреулері бойынша белгілі бір талаптарға өзгерістер енгізу мақсатында Парламент депутаттары мен министрлік өкілдерінің қатысуымен жүйелі мәселелерді талқылап, сыбайлас жемқорлықтың алдын алу үшін кешенді кеңес өткізу жоспарлануда.
