Түркістан әуежайынан халықаралық рейстер саны артты, деп хабарлайды ҚР Индустрия және инфрақұрылымдық даму министрлігінің баспасөз қызметі.
“2021 жылдың 3 мамырынан бастап Turkish Airlines авиакомпаниясы Түркі әлемінің рухани астанасы Түркістан қаласынан Ыстамбұлға тұрақты жолаушылар рейстерін іске қосуды жоспарлап отыр.
Түрік авиакомпаниясы Түркістан мен Ыстамбұл қалалары арасында аптасына үш рет (сейсенбі, бейсенбі, сенбі) Б-737 типті әуе кемесінде тұрақты әуе қатынасын орындайды”, – делінген сенбі күнгі хабарламада.
2021 жылғы 17 мамырдан бастап отандық лоукост тасымалдаушы Fly Arystan (“Эйр Астана” компаниялар тобы) Түркістан мен Ыстамбұл қалалары арасындағы орындалатын рейстер санын аптасына жеті рейске дейін (күн сайын) ұлғайтуды жоспарлап отыр.
“Осылай, ағымдағы жылдың мамыр айында екі қала арасында аптасына 10 тұрақты жолаушылар рейсі орындалады деп күтілуде. Сонымен қатар, Түркістаннан Бішкекке (Қырғызстан), Ташкентке (Өзбекстан) және т.б. жаңа рейстерді іске қосу жоспарлануда”, – деп жазады баспасөз қызметі.
Рейстер санитарлық-эпидемиологиялық талаптарды қатаң сақтайды және әуекомпанияның сайтында жарияланған кестеге сәйкес ұшатын болады.
