Түркістан қаласының әуежайынан алғашқы халықаралық рейс іске қосылды. Бұл туралы “ҚазАқпарат” ХАА, ҚР ИИДМ баспасөз қызметіне сілтеме жасай отыра хабарлайды.
2021 жылғы 21 наурызда көктемгі Наурыз мерекесі қарсаңында Елбасы мен ҚР Президентінің тапсырмасымен құрылған тұңғыш отандық лоукост Fly Arystan (“Эйр Астана” компаниялар тобы) Қазақстанның рухани астанасы Түркістан қаласынан Ыстамбұлға алғашқы халықаралық тұрақты рейс іске қосылды. Түркістан және Ыстамбұл қалалары арасында тұрақты әуе қатынасы аптасына 2 рейс жиілігімен (жұма, жексенбі) А-320 типті әуе кемесі орындайтын болады, бұл кезең-кезеңімен аптасына 7 рейске дейін (күн сайын) ұлғаяды. Билет құны 39 999 теңгеден басталады. Ағымдағы жылдың 21 наурызынан бастап Түркістан-Ыстамбұл алғашқы рейсіне 176 билет сатылды (98% жүктеу).
Алғашқы тұрақты рейс іске қосылғаннан бастап (2020 жылғы 1 желтоқсан) Түркістан қаласының әуежайынан 80-нен астам рейс орындалып, 23 мыңға жуық жолаушы тасымалданды, рейстердің орташа коммерциялық жүктемесі 85%-ды құрады. Түркі әлемінің рухани орталығы ретінде Түркістанды 10 облыс орталығымен (Ақтау, Ақтөбе, Атырау, Қарағанды, Көкшетау, Қостанай, Павлодар, Петропавл, Талдықорған, Өскемен) аптасына 53 рейс жиілігімен қосу жоспарланып отыр. Түркістан қаласының әуежайы шетелдік авиакомпаниялар үшін “ашық аспан” режиміне қосылған, бұл оның ұшу географиясын кеңейтеді және шетелдік туристер ағынын тартуға ықпал етеді. Жоспарда — Түркістаннан Новосибирскіге (РФ), Бішкекке (Қырғызстан), Ташкентке (Өзбекстан) және т.б. жаңа рейстерді іске қосу бар, рейстер санитарлық-эпидемиологиялық талаптарды қатаң сақтап, әуекомпания сайтында жарияланған кестеге сәйкес орындалатын болады.
