Түркістан облысының басшысы Өмірзақ Шөкеев осы жылдың мамыр айында Өзбекстандағы Сардоба су қоймасы бөгетінің жарылуы салдарынан болған су тасқынынан зардап шеккен Мақтаарал ауданына жұмыс сапарымен барды, деп хабарлайды “Қазақпарат” ақпарат агенттігі.
Облыс басшысы сапарының мақсаты – су тасқынынан зардап шеккен азаматтар үшін салынған үйлердің сапасын тексеру.
Өмірзақ Шөкеев Мақтарал ауданында Оргебас және Фирдоуси кенттерінің тұрғындарымен кездесіп, олардың өтініштері мен тілектерін тыңдады. Осы елді мекендерде өңір басшысы әрбір салынған үйді тексеріп, қалпына келтіру жұмысының барысын тексерді.
Шөкеевтің баспасөз қызметінің хабарлауынша, Фирдоусиде 53 үйдің құрылысы, Өргебаста 39 үйдің құрылысы аяқталған.
Сапар аясында облыс әкімі су тасқынынан зардап шеккен азаматтарды қоныстандыратын Мырзакент кентінің жаңа шағын ауданында болды.
Бүгінгі таңда шағын ауданда 200 үйдің құрылыс жұмыстары аяқталды. Онда барлығы 386 жеке тұрғын үй салу жоспарлануда, оның 196-сы үкімет резерві есебінен, ал қалғаны – қорлар есебінен.
Сурет: inform.kz
