Түркістан облысының басшысы Өмірзақ Шөкеев жұмыс сапарымен Түркістанға барып, құрылыс жұмыстарының барысын тексерді, деп хабарлайды облыс әкімдігінің баспасөз қызметі.
Облыс орталығын аралау кезінде Шөкеев 24 тұрғын үй құрылысының жүзеге асырылу барысын тексерді. Мердігерлердің айтуынша, бұл үйлердің құрылысын ағымдағы жылы аяқтау жоспарланып отыр.
Сондай-ақ, Түркістан қаласында аймақ басшысы салынып жатқан 7 мың орындық стадионда болды. Оның құрылысын шілде айында бітіру жоспарланып отыр. Стадионды пайдалануға бергеннен кейін, футболдан Қазақстан чемпионатының ойындары өтеді.
Облыс орталығына сапары аясында Өмірзақ Шөкеев көп функционалды”Керуен-сарай” туристік кешенінің құрылысы мен “Парасат” паркін жаңарту жұмыстарының іске асу барысын да тексерді. Осы жұмыстардың барлығын биылғы жылы аяқтау жоспарланып отыр.
Жұмыс сапарының соңында облыс әкімі Түркістанды абаттандыру мен көгалдандыру жұмыстарын аяқтау қажеттігін айтты.
Өмірзақ Шөкеев облыс орталығында жүргізіліп жатқан барлық құрылыс жұмыстары сапалы және белгіленген мерзімде орындалуы тиіс екенін баса айтты.
Сурет: gov.kz
