Түркістан облысының әкімі Өмірзақ Шөкеев соңғы жылдарда өңірдің дамуы туралы айтты, деп хабарлайды «ҚазАқпарат»ХАА.
«Түркістан жаңғыра бастады. Түркі елдері рухани орталық ретінде қадірлейтін Түркістан қаласы енді алып құрылыс алаңына айналып, дамудың жаңа сатысына көтерілді. Қала қазір үш бағытта дамып келеді. Қожа Ахмет Ясауи кесенесінің аумағы толықтай абаттандырылып, келушілерге қолайлы жағдай жасалуда», — деді Өмірзақ Шөкеев» Түркістан-Түркі әлемінің рухани астанасы» халықаралық онлайн-конференциясында.
Оның айтуынша, Ясауи және Рабия Сұлтан Бегім кесенелерін қалпына келтіру, Хазірет Сұлтан қорық-мұражайының аумағын абаттандыру, ежелгі Күлтөбе қонысының тарихи орындарын қалпына келтіру жұмыстары қарқынды жүргізілуде.
«Тарихи, мәдени орталық көз қуанту үшін құрылған. Бұл рухани, мәдени орталықта визит-орталығы, «Ұлы дала» орталығы, «Яссауи» мұражайы, «Фараб» кітапханасы, театр, республикадағы алғашқы халықаралық туристік және қонақ университеті сияқты бірнеше маңызды нысандар салынды», — деп түйіндеді өңір басшысы.
