Түркістан облысының әкімдігінде кеше Шымкент қаласында өткен, азаматтар қолдамаған, флешмоб туралы айтылды, деп хабарлайды tengrinews.kz ақпарат ресурсы.
Шымкентте медицина қызметкерлері жолда сап түзеп, коронавирус инфекциясынан қаза тапқандарды бір минут үнсіздікпен еске алған бейнежазба желіде жарияланғаннан кейін, азаматтар дәрігерлердің жұмыстарына кедергі келтіріп, 40 градус ыстықта акцияға қатысуға мәжбүрлегенін айтып, наразылық білдірді.
Түркістан облысы әкімінің орынбасары Сәкен Қалқамановтың айтуынша, флешмоб Түркістан облысына қарасты туберкулез диспансерінің бас дәрігері бастамасымен өткізілді.
Облыстық атқарушы билік органы бұл флешмобты ұйымдастырған бас дәрігер жауапкершілікке тартылмайтынын мәлімдеді.
«Кеше ақпарат жеткіліксіз болды. Дәрігер медициналық қызметкерлер қауымдастығының шақыруына қосылып, бұл әрекетті ұжыммен келіскені анықталды. Сондықтан озбырлық деп жазалауға болмайды», — деп түсіндірді Сәкен Қалқаманов.
Түркістан облысында коронавирус жұқтырғандар саны 2301 құрайды. Қазақстан Республикасында олардың жалпы саны 61755-ке жетті.
