Түркістан облысының әкімі Өмірзақ Шөкеев жұмыс сапарымен Мақтарал ауданына барды, онда су тасқынынан зардап шеккен тұрғындарға арналып салынып жатқан үй құрылысының жұмысы қалай жүзеге асырылып жатқанын тексерді, деп хабарлайды «ҚазАқпарат».
Бастапқыда облыс әкімі 133 үй қиратылған Өргебас елді мекенінде болды. Қазір онда жаңа үйлердің іргетасын салуға дайындық жұмыстары жүріп жатыр.
274 үй бұзылған Фирдоуси ауылын аралау барысында аймақ басшысына 116 үйдің іргетасы қаланғанын, 10 үйде жұмысшылар қабырға қалаумен айналысып жатқанын айтты.
Сондай-ақ, Мақтарал ауданына сапары аясында Шөкеев су тасқынынан зардап шеккен азаматтарды қоныстандыратын жаңа шағын ауданның құрылысы жүріп жатқан Мырзакент елді мекенінде болды.
Қазіргі уақытта осы ауданда 386 үйдің құрылысы жүргізіліп жатыр, оған 1553 жұмысшы жұмылдырылды. Екі үйдің құрылысы толық аяқталды.
Өз сапарының соңында Өмірзақ Шөкеев барлық мердігер ұйымдар Мақтарал ауданындағы үйлердің құрылысын сапалы және мерзімінде аяқтауы тиіс деп мәлімдеді.
Сурет: inform.kz
