Жыл қорытындысы бойынша Түркістан облысында 828 нысан, 1,5 мың шақырымнан астам жол мен көше жөнделіп, пайдалануға берілді. Ауқымды жұмыс биыл да жалғасады.
2021 жылы жақсы және қанағаттанарлық жағдайдағы жергілікті маңызы бар көлік жолдарының үлесін 81,4% — ға дейін жеткізу жоспарлануда. Бұл туралы облыс әкімі Өмірзақ Шөкеевтің төрағалығымен өткен аппараттық кеңес барысында айтылды, деп ҚазАқпарат облыстық әкімдіктің баспасөз қызметіне сілтеме жасап хабарлайды.
Облыс бойынша көлік жолдары мен елді мекендер көшелерінің ұзындығы 17 637 шақырымды құрайды. Өткен жылы көлік жолдарын дамытуға бюджеттен 54,8 млрд теңге бөлінді. Облыстық жолаушылар көлігі және көлік жолдары басқармасының басшысы Ролан Ибрагимовтың айтуынша, биыл бюджеттен жол саласын дамытуға 19,9 млрд теңге бағытталмақ. 156 нысанды немесе елді мекендердің 538 км жолдары мен көшелерін қамту жоспарлануда. Ағымдағы жылы Түркістан қаласының әуежайына көлік жолын, Түркістан — Кентау, Түркістан — Балтакөл, Кентау — Ащысай, Шымкент — Ақсукент, Ақсукент — Қарамұрт, Шымкент — Сайрам, Шарапхана — Жаңабазар бағыттарындағы көлік жолдарын пайдалануға беру күтілуде.
Бұдан басқа, Мақтаарал, Жетісай және Келес аудандарындағы облыстық маңызы бар көлік жолдарын реконструкциялау жұмыстарын аяқтау жоспарлануда. Сәуір айында Түркістан қаласының әуежайына апаратын 16,3 шақырым автожол пайдалануға беріледі. Бүгінгі таңда ұзындығы 19 км Түркістан — Кентау жолына орташа жөндеу жүргізілуде, оның ішінде тротуарлар, веложолдар салынуда, жарықтандыру тіректері орнатылуда. Сонымен қатар, Кентау қаласынан облыс орталығына қарай 26,6 км кіреберіс жолға жөндеу жұмыстары басталды.
Сонымен қатар, Түркістан — Балтакөл, Түркістан – Қарнақ — Кентау, Кентау — Ащысай бағыттарындағы 113,2 км көлік жолдары күрделі және орташа жөндеумен қамтылды. Жөндеу жұмыстары жыл соңына дейін толық аяқталады. Сонымен қатар, қазіргі уақытта Шымкент — Ақсукент, Ақсукент — Қарамұрт, Шымкент — Көксаек бағыттарында 50 км-ден астам көлік жолдары жөнделуде. Барлық жұмыстар биыл аяқталады. Сонымен қатар, Мақтаарал, Жетісай және Келес аудандарында 50 км-ге жуық жол жөнделуде. Сондай-ақ, осы аудандардың аумағында жалпы ұзындығы 184,6 км болатын 11 жол жаңартылады.
