Түркістан облысының Созақ ауданына қарасты Бабаата ауылында Ұлы Отан соғысының 400 жауынгері мен тыл еңбеккерлерінің есімдері жазылған Жеңіс мемориалының салтанатты ашылуы өтті, деп хабарлайды “Қазақпарат” ақпарат агенттігі.
Мемориалдың ашылу салтанатына Созақ ауданының әкімі Салыхан Полатов, аудандық ардагерлер кеңесінің төрағасы Қабыл Еспенбетов және жергілікті тұрғындар шақырылды.
Салтанатты іс-шара барысында аудан әкімі мемориалдық тақта Созақ ауданынан майданға кеткен Ұлы Отан соғысы ардагерлерін есте сақтау үшін ашылғанын мәлімдеді. Ол біздің азаматтарымыз туған жері үшін күрескен сарбаздардың есімдері мен ерліктерін ешқашан ұмытпауы керек екенін атап өтті.
Сол күні Бабаата кентінде балаларға барлық жағдай жасалған, әткеншектер, жеңіл автомобильдердің макеттері мен төбешіктер орнатылған балалар ойын алаңы ашылды.
Мемориалдық тақта мен балалар алаңын жасау жобалары “Қазатомөнеркәсіп” ұлттық компаниясы мен “Росатом” Ресей мемлекеттік корпорациясының қолдауымен жүзеге асырылды.
Бүгінгі таңда “Қазатомөнеркәсіп” әлемдегі ең ірі ресурстық базалардың біріне қол жеткізу басымдығына ие уран өндірушілер болып табылады.
Сурет: inform.kz
