Түркістан облысында алдағы екі жыл ішінде жалпы құны 2,5 триллион теңгелік 115 жоба іске асырылатын болады. Бұл туризм, құрылыс, қайта өңдеу өнеркәсібі, баламалы энергетика және «Жасыл» экономика салаларындағы жобалар, деп «ҚазАқпарат»ХАА хабарлайды.
Сонымен қатар, соңғы екі жылда өңірде шағын және орта кәсіпкерлік субъектілерінің саны 15 мыңға артып, 141 мыңға жетті. 2020 жылы облыс кәсіпкерлері 554 миллиард теңгенің өнімін өндірді. Биыл бұл көрсеткіш 900 миллиард теңгеге жетеді деп күтілуде. Түркістан облыс орталығына айналғаннан бері мұнда құрылыс қарқыны төмендеген жоқ. Ежелгі қала екі бағытта дамып келеді: мәдени-рухани орталық және әкімшілік-іскерлік орталық. Елбасы атап өткен екі орталықтағы барлық нысандар аяқталып, пайдалануға берілді. Бұдан басқа, мұнда тұрғын үй құрылысы жандандырылды. 2019 жылы 150 мың шаршы метр тұрғын үй пайдалануға беріліп, биыл 390 мың шаршы метр тұрғын үй пайдалануға беріледі деп жоспарлануда. Сондай-ақ, жаңа жобалар іске асырылуда.
«Жаңа жобаларды жүзеге асыру басталды, 20 қабатты екі үйдің құрылысы жүргізілуде. Сонымен қатар, 18 қабатты бизнес орталығы мен 16 каскадты үйдің құрылысы басталды. Жеке құрылыс салушылардың қаражаты есебінен 5 қабатты үйлер салынуда, ӘКК есебінен де құрылыс жүргізілуде. Биыл облыс бойынша 790 мың шаршы метр тұрғын үйді пайдалануға беру керек», — деді облыстық құрылыс басқармасының басшысы Тоқтар Үсіпалиев.
Бірнеше күннен кейін Түркістанда Орта Азияда теңдесі жоқ «Керуен сарай»кешенін пайдалануға беру жоспарлануда. Облыс құрылғаннан кейін мұнда 100-ден астам инвестициялық жоба іске асырылды. «Өткен жылы Елбасы Түркістан-Шымкент-Ташкент жылдам пойызын іске қосу жөніндегі ірі жобаны атап өтті. Біз бұл жоба экономикалық тұрғыдан да, екі бауырлас ел арасындағы туризмді дамыту үшін де көптеген пайда әкеледі деп санаймыз. Себебі Өзбекстаннан 7 миллион турист келеді. Қазақстан мен Өзбекстандағы туристер екі елге де оңай жетуге мүмкіндік алады. Түркістаннан Ташкентке 1 сағат 45 минутта жетуге болады», — деді облыс әкімінің орынбасары Мейіржан Мырзалиев. Биылғы жылы 10 жобаны іске асыру жоспарлануда, оның 6-ы жыл соңына дейін аяқталатын болады.
