Түркістан облысы әкімінің орынбасары Мейіржан Мырзалиев шағын және орта бизнесті дамыту, инвестиция тарту мәселелері бойынша бірқатар кездесулер өткізді, деп хабарлайды «ҚазАқпарат» ХАА облыс әкімінің баспасөз қызметіне сілтеме жасап.
«Атамекен» кәсіпкерлер палатасы облыстық филиалының алаңында аймақ басшысының орынбасары «қарапайым заттар экономикасы» жобалық кеңсесінің отырысын өткізді. Кездесуге «қарапайым заттар экономикасы» бағдарламасына қатысушы Түркістан облысы бойынша екінші деңгейдегі банктердің тоғыз филиалының басшылары қатысты. Кездесуге қатысушылар осы бағдарлама аясында өңірдегі басым жобаларды жүзеге асыруды талқылады. Мейіржан Мырзалиевтың айтуынша, жеңілдікті несиелеу бағдарламасы мемлекет басшысының ерекше бақылауында. Бағдарламаны тиімді іске асыру барлық мүдделі тараптардың, атап айтқанда бизнес-жобаларды тікелей қаржыландыратын ЕДБ жұмысының үйлесімділігіне байланысты. Сонымен қатар, ол облыс әкімдігі тарапынан қаржы институттарына аталмыш жобаларды жүзеге асыру мақсатында барлық қолдау көрсетілетінін айты. Өз кезегінде, екінші деңгейлі банктердің өкілдері жалпы сомасы 26,3 млрд. теңгеге 15 жобаны қаржыландыруға дайын екендігі туралы хабардар етті,осы жобалар мақұлданған жағдайда, өңір мақұлданған жобалар саны бойынша жетекші позицияларды бекітеді.
Сондай-ақ, кеңеске қатысушыларға кепілдік беру құралын енгізу, айналым қаражатын толықтыруды қаржыландыру мөлшерін 50% — ға дейін ұлғайту бөлігінде бағдарламаға қабылданған түзетулер туралы айтылды. Бұдан басқа, жақын арада бағдарламаны бизнес үшін одан әрі тартымды ететін басқа да бірқатар түзетулер қабылданатын болады. Бұл ретте өзгерістер бұрын бағдарлама бойынша несие алған кәсіпкерлерге де қатысты болады. Кездесу қорытындысы бойынша, әкімнің орынбасары жобаларды жүзеге асыруға кедергі келтіретін қандай да бір мәселелерді шешу үшін кәсіпкерлермен ашық диалогқа дайын екендіктерін білдірді.
