Түркияның астанасы Анатолий Өркениеттер мұражайында “Ұлы дала: тарих және мәдениет” атты еліміздің ұлттық мұражайы көрмесінің салтанатты ашылу рәсімі өтті.
Салтанатты ашылу рәсіміне Қазақстан тарапынан ҚР Ұлттық музейінің директоры Арыстанбек Мұхамедиұлы мен Қазақстан Республикасының Түрік Республикасындағы төтенше және өкілетті елшісі Абзал Сапарбекұлы қатысты.
Салтанатты іс-шара барысында Арыстанбек Мұхамедиұлы біздің еліміз өзінің көшпенді өркениеті және тарихымен әлемдік қауымдастықты қызықтыратынын атап өтті.
“Қазіргі уақытта Қазақстанда ҚР Тұңғыш Президенті — Елбасы Н. Ә. Назарбаевтың “Рухани жаңғыру”, “Ұлы даланың жеті қыры” бағдарламалары аясында мәдениет және өнер саласында үлкен жұмыстар жүргізілуде. Олардың бірі – “Алтын адамның әлем мұражайларына шеруі” халықаралық жобасы. ҚР мәдениет және спорт министрлігінің қолдауымен ҚР Ұлттық музейі жүзеге асырып отырған осы жоба аясында Қазақстанның тәуелсіздігінің символына айналған Алтын адам Еуропа, Азия және басқа да елдердің жиырма елінің көрмелеріне ұсынылды”, – деді Ұлттық музей директоры.
Арыстанбек Мұхамедиұлы бұл көрменің мақсаты еліміздің мәдени мұрасымен таныстыру екенін айтты.
Сонымен қатар, ол көрмеге Қазақстанның Ұлттық музейінің қорынан 207 жәдігер қойылғанын хабарлады.
Мұхамедиұлы сөзінің соңында Түркияның Мәдениет министрлігіне, Қазақстан Республикасының Түрік Республикасындағы елшілігіне және ТҮРІКСОЙ халықаралық ұйымына көрмені ұйымдастыруға көрсеткен көмегі үшін алғысын білдірді.
Сурет: 24.kz
