Қазақстан Қаржы министрлігі жанындағы Қаржы мониторингі комитеті Нұр-Сұлтанда Түркиядан келген кәсіпкерге қатысты қылмыстық істі қарау бойынша сот отырысы өткенін айтты. Бұл туралы 365info.kz ақпарат агенттігі жазады.
Атап айтқанда, басшысы Түркия Республикасының азаматы болып табылатын Beshel Construction ЖШС-не қатысты салықтық тексеру жүргізілді.
Тексеру нәтижелері бойынша 2015-2018 жылдар аралығында Қазақстанда жұмыс істеген кәсіпорын 164 миллион теңгеден астам сомаға салық төлемегені анықталды.
Осыған байланысты BESHEL Construction ЖШС басшысына қатысты салық төлеуден жалтару фактісі бойынша қылмыстық іс қозғалды.
Сот шешімімен түрік кәсіпкері қылмыс жасағаны үшін кінәлі деп танылды. Салық төлеуден жалтарғаны үшін ол екі жылға бас бостандығын шектеу жазасын алды.
Түркия азаматы жазасын өтегеннен кейін, біздің мемлекеттен шығарылады және келесі бес жыл ішінде оған Қазақстан аумағына кіруге тыйым салынады.
Сурет: depositphotos.com
