Батыс Қазақстан облысы бойынша сыбайлас жемқорлыққа қарсы күрес ведомствосы басшысының орынбасары Нұрдәулет Сәмет өңірде қанша сыбайлас жемқорлық қылмыс анықталғанын айтты. Бұл туралы “Хабар24” ақпарат агенттігі хабарлады.
Батыс Қазақстан облысы бойынша сыбайлас жемқорлыққа қарсы іс-қимыл агенттігі өткен жылы 138 сыбайлас жемқорлық қылмысын анықтады, оның жартысына жуығы парақорлыққа қатысты.
Осыған байланысты 100 қылмыстық іс сотқа жіберілді, оның шешімі бойынша 32 адам сотталды. Сонымен қатар, 35 миллион теңгеге айыппұл салынды.
Сыбайлас жемқорлыққа қарсы қызметтің статистикасына сәйкес, сыбайлас жемқорлыққа байланысты анықталған қылмыстардың басым бөлігін жергілікті атқарушы билік органдарының шенеуніктері жасады.
Сондықтан сыбайлас жемқорлыққа қарсы іс-қимыл агенттігінің қызметкерлері тұрақты негізде әр түрлі алдын алу жұмыстарын өткізіп, сыбайлас жемқорлық қылмысы үшін қандай қауіп төнетінін түсіндіреді.
