Сенаторлар «Қазақстан Республикасының кейбір заңнамалық актілеріне сыбайлас жемқорлыққа қарсы іс-қимыл мәселелері бойынша өзгерістер мен толықтырулар енгізу туралы» заң жобасын екінші оқылымда қарады, деп «ҚазАқпарат»ХАА тілшісі хабарлайды.
Заң жобасы ҚР Үкіметінің 2019 жылға арналған заң жобалау жұмыстарының жоспарына сәйкес әзірленді. Бұл заң жобасын Сенат биылғы 25 маусымда бірінші оқылымда тұжырымдамалық тұрғыдан мақұлдады.
«Заң жобасының негізгі міндеті сыбайлас жемқорлық көріністерінің жүйелі алдын алу бойынша қосымша шараларды енгізу болып табылады, атап айтқанда: мемлекеттік қызметшілерге кез келген құнды сыйлықтарды сыйға тартуға тыйым салынады; сыбайлас жемқорлық субъектілеріне дербес құрылымдық бөлімшенің басшысынан төмен емес лауазымды адамдарды, сондай — ақ квазимемлекеттік секторда сатып алумен айналысатын адамдарды жатқызу ұсынылады; сыбайлас жемқорлыққа қарсы шектеулерді қабылдайтын адамдардың отбасы мүшелеріне материалдық сыйақы, сыйлықтар немесе қызметтер қабылдауға тыйым салу енгізіледі», — деп Сенат депутаты Андрей Лукин атап өтті.
Сондай-ақ квазимемлекеттік сектор ұйымдарында корпоративтік адалдық стандарттарын сақтауға жауапты сыбайлас жемқорлыққа қарсы комплаенс-қызметтер институтын енгізу көзделеді. Бұдан басқа, сыбайлас жемқорлыққа қарсы іс-қимыл ұлттық бюросын Қазақстан Республикасының Сыбайлас жемқорлыққа қарсы іс-қимыл агенттігі етіп қайта құруға байланысты түзетулер ұсынылады. Заң жобасында 4 кодекс пен 10 заңға өзгерістер мен толықтырулар енгізу көзделген.
Андрей Лукин атап өткендей, заң жобасын екінші оқылымда талқылау барысында Мәжіліс мақұлдаған заң жобасына өзгерістер енгізу қажеттілігі туындады.
«Мәселен, Қылмыстық кодекстің 412-1-бабына (қылмысты арандату) өзгерістер енгізу ұсынылады, оған сәйкес қылмысты арандату деп жедел-іздестіру қызметін немесе сотқа дейінгі тергеп-тексеруді жүзеге асыратын лауазымды адамның кейіннен әшкерелеу және қылмыстық жауаптылыққа тарту немесе бопсалау мақсатында адамды қылмыс жасауға көндірген заңсыз әрекеттері түсініледі. Бұдан басқа, 2020 жылғы 1 шілдеден бастап қолданысқа енгізілген Қазақстан Республикасының Әкімшілік құқық бұзушылық туралы Кодексінің (бұдан әрі – Кодекс) 1-бабы 2-1-бөлігінің талаптарына сәйкес кодекске өзгерістер және (немесе) толықтырулар енгізу Қазақстан Республикасының басқа да заңнамалық актілеріне өзгерістер мен толықтырулар енгізуді көздемейтін заңмен жүзеге асырылады. Осыған байланысты кодекске енгізілген түзетулерді заң жобасынан алып тастау қажет», — деп депутат атап өтті.
Заң жобасы бойынша мүдделі мемлекеттік органдармен тиісті жұмыс тобы өткізіліп, онда жоғарыда көрсетілген түзетулер талқыланды.
Сенаторлар заң жобасын Мәжіліске қайтарды.
«Баяндалғанды ескере отырып, Конституциялық заңнама, сот жүйесі және құқық қорғау органдары комитеті «Қазақстан Республикасы Парламентінің комитеттері мен комиссиялары туралы» Қазақстан Республикасы Заңының 29 — бабының 1), 7) тармақшаларын басшылыққа ала отырып, Сенат отырысының қарауына енгізеді және Қазақстан Республикасы Конституциясының 61-бабының 5-тармағына сәйкес Парламент Мәжілісіне «Қазақстан Республикасының кейбір заңнамалық актілеріне сыбайлас жемқорлыққа қарсы іс-қимыл мәселелері бойынша өзгерістер мен толықтырулар енгізу туралы» заң жобасына өзгерістер жіберуді ұсынады», — деп сенатор мәлімдеді.
