Алматы қалалық сотының төрағасы Нұрғазы Әбдіқанов қалалық соттардың жобалық кеңсесінің жұмысын бастады, деп хабарлайды Zakon.kz, қалалық соттың баспасөз қызметіне сілтеме жасап.
«Жобалық кеңсе сот органдарының қызметін жетілдіру үшін құрылған. Оның ашылуы қолайлы іскерлік ахуал жасауға, азаматтардың сот билігіне сенімін арттыруға, жалпы соттардың оң имиджін қалыптастыруға ықпал ететін болады. Біз әрқашан жаңа идеялар үшін ашық және оларды іске асыру үшін жұмыс істеуге дайынбыз», — деді Н. Әбдіқанов.
Жобалық кеңсенің комиссары болып, Алматы қаласы бойынша Соттар әкімшісі басшысының орынбасары Зульфия Баки тағайындалды.
Соттардың жобалық кеңсесі Наурызбай аудандық сотының базасында орналасқан. Ол ашық кеңістік принципі бойынша құрылған және барлық қажетті жиһаздармен, сот-құқықтық әдебиеттері бар стеллаждармен, компьютерлермен, оргтехникамен, проектормен, маркерлік тақтамен, стационарлық қосымшасы бар теледидармен және телефон желісімен жабдықталған.
Іс-шараға қатысушылар «Е-сот», «виртуалды сот», «Түнгі сот», «Татуласу: сотқа дейін», «төреші көмекшісі» пилоттық жобаларын практикалық іске асыруды талқылады.
Сонымен қатар, алқабилер институтының қызметін кеңейту, тергеу сотының екінші ауысымын енгізу, кадр саясатын жетілдіру және судьяларға кандидаттардың тілдік дайындығын арттыру бойынша ұсыныстар ұсынылды.
Алматы қаласы соттарының жобалық кеңсесінің жұмысы үш бағытқа бөлінген. Оның базасында азаматтық, азаматтық іс жүргізу, әкімшілік, қылмыстық және қылмыстық іс жүргізу заңнамасы бойынша, сондай-ақ сот төрелігіне қол жеткізуді және сот органдарының сервистік қызметтерін қамтамасыз ету бойынша идеялар мен ұсыныстар әзірленетін болады.
Оның базасында судьялар мен соттардың мемлекеттік қызметшілері үшін ғылыми дәрістер, оқыту семинарлары — тренингтер өткізілетін болады.
Оның жұмысына қаланың мемлекеттік органдарының, қоғамдық және бұқаралық ақпарат құралдарының өкілдері белсенді тартылады.
Іс-шараға Алматы қалалық сотының төрешілері, мемлекеттік органдардың, адвокаттардың, қоғамдық және коммерциялық ұйымдардың өкілдері қатысты.
