Солтүстік Македония Парламентінің депутаты Энес Ибрагим Қазақстан астанасында өткен Еуразия елдері Парламенттері спикерлерінің төртінші кеңесінің қорытындысына түсініктеме берді.
Энес Ибрагим өткен Еуразия елдері парламенттері спикерлерінің кеңестері форумның барлық қатысушылары үшін пайдалы болды деп санайды. Сондай-ақ, ол осындай ауқымды іс-шараның ұйымдастырылуы мен өткізілуін жоғары бағалады.
“Барлық қатысушы елдердің дайындық деңгейі Еуропа мен Азия арасындағы ынтымақтастықты дамытуда өз нәтижесін көрсетеді деп үміттенемін. Іс-шараны ұйымдастыру табысты және лайықты деңгейде болғанын айта аламын. Сонымен қатар, бұл Нұр-Сұлтан қаласына ерекше мән берді”, – деді депутат.
Энес Ибрагим өз елінде Қазақстанның дамуына ерекше көңіл бөлінетінін атап өтті. Сонымен қатар, ол біздің ел мен Солтүстік Македония арасындағы ынтымақтастықтың болашағы туралы айтты.
“Екі ел арасындағы ынтымақтастық одан әрі нығая түседі деп ойлаймын, әсіресе, Солтүстік Македония парламентінің спикері Талат Джафери сіздің республикаңызға алғаш рет ресми сапармен келгенде. Солтүстік Македония Қазақстанды Еуропаға қақпа ретінде қарастыруы мүмкін. Менің ойымша, білім, мәдениет және экономика салаларындағы ынтымақтастық екі ел үшін де тиімді болады”, – деп түйіндеді Энес Ибрагим.
