Солтүстік Қазақстан облысында Ұлы Отан соғысына қатысқандардың «Сіздердің есімдеріңізді есімізде» атты электрондық дерекқоры жұмыс істей бастады, деп хабарлайды «ҚазАқпарат» ақпараттық ресурсы.
Бұл туралы облыстық мәдениет, мұрағаттар және құжаттама басқармасының басшысы Құралбек Атамұратов толығырақ айтты. Оның айтуынша, электрондық мәліметтер базасын құру бойынша Солтүстік Қазақстан мемлекеттік мұрағатының мамандары жұмыс істеді.
Бұл базада соғыстан оралған, қаза тапқан және хабар-ошарсыз кеткен қазақстандықтар туралы ақпарат бар. Сондай-ақ онда әскерге шақырылғандардың дербес деректері бар.
Құралбек Атамұратов құрылған базадағя ақпараттарды іздеуде Қазақстан мен Ресейдің қорғаныс ведомстволарының және Беларусь мұрағаттарының құжаттары пайдаланылғанын атап өтті.
Атамұратовтың айтуынша, электронды база ашылғаннан кейін, Ұлы Отан соғысы сарбаздарының туысқандарынан хаттар саны артты. Оның айтуынша, базаны облыстық мұрағаттың ресми сайтынан қарауға болады.
Солтүстік Қазақстан облыстық ішкі саясат басқармасының басшысы Кемел Оспанов өз кезегінде Жеңіс күні қарсаңында өңірде тұратын ардагерлер бір миллион теңге көлемінде біржолғы материалдық көмек алады деп мәлімдеді. Оның айтуынша, қазіргі уақытта облыста Ұлы Отан соғысының 52 қатысушысы тұрады.
Сурет: pravda.ru
