Солтүстік Қазақстан облысының бас санитарлық дәрігері Татьяна Горлова өңірге келген барлық азаматтар міндетті түрде коронавирустық инфекцияға тест өтіп жатқанын айтты.
“16 сәуірден бастап мемлекеттік шекара арқылы келіп, Солтүстік Қазақстан облысында қалған барлық тұрғындарды тестілеу басталды. Бұл өз нәтижесін берді. 16 сәуірде 20 адам тексеріліп, бір инфекция жұқтырған адамды анықтады”, – деді Горлова.
Сонымен қатар, ол өңірге шетелден студенттер әлі күнге дейін келіп жатқанын айтты. Осыған байланысты, оның айтуынша, барлық келушілерді тестілеу туралы шешім қабылданды.
Соңғы мәліметтерге сәйкес, Солтүстік Қазақстанда коронавирус ауруының 29 оқиғасы ресми түрде тіркелді, ал елімізде олардың саны 1546-ға жетті.
Бұған дейін хабарланғандай, Қазақстанның бас санитарлық дәрігері Айжан Есмағамбетова індетке қарсы күрес мақсатында еліміздің барлық өңірлерінде банк және пошта бөлімшелерінің, валюта айырбастау пункттерінің және бөлшек сауда жүргізетін азық-түлік базарларының жұмысын тоқтату сияқты жаңа шектеу шараларын енгізу туралы қаулыға қол қойды.
