«Bio Operations» ЖШС қайта өңдеу зауыты биоэтанол өндіретін жаңа цехты іске қосуға дайындалуда. Бұл туралы «Қазақпарат» ақпарат агенттігінің тілшісі хабарлайды.
Солтүстік Қазақстан облысы әкімінің орынбасары Марат Тасмағанбетов аграрлармен кездесу барысында 2019 жылы зауыт 7 мың тонна крахмал және 2 мың тонна дәнмаңызын өндіргенін хабарлады. Бұл өнім Алматы, Қостанай мен Өзбекстанға жеткізіледі.
Сондай-ақ, облыс әкімінің орынбасары бұл зауыт өндіретін өнімнің шегі емес екенін хабарлады. Бұл зауыттың қуаттылығы жыл сайын 39 мың тонна крахмал, 10 мың тонна желімтек, 60 мың тоннадан астам ұн және 41 мың тонна жем-шөп өнімдерін шығаруға мүмкіндік береді. Орынбасар болашақта зауыт одан әрі дами беретінін айтты.
2019 жылдың соңында кәсіпорын қуаттылығы жылына 36 мың тонна биоэтанол өндіретін цехты іске қосуды жоспарлап отыр. 2022 жылға қарай кәсіпорынның жүктемесі 100%-ға жетеді. Крахмал өндірісін 39 мың тоннаға дейін, дәнмаңызын 10 мың тоннаға дейін және биоэтанол өндірісін 36 мың тоннаға дейін ұлғайту жоспарлануда», – деді Тасмағанбетов.
Сурет: Vestnikapk.ru
