Солтүстік Қазақстан аумағында өңірдегі эпидемиологиялық ахуалдың нашарлауына байланысты жаңа шектеу шаралары енгізілетін болады. Тиісті қаулыға өңірдің бас мемлекеттік санитарлық дәрігері қол қойды.
Солтүстік Қазақстанда уақытша шектеу шаралары 24 шілдеден 27 шілдеге дейін және 31 шілдеден 3 тамызға дейін енгізіледі.
Осы кезеңде аймақ тұрғындарына туысқандарына, достарына және көршілеріне қонаққа баруға, отбасылық іс-шаралар өткізуге тыйым салынады, көлікпен және жаяу жүру шектеледі, коронавирустың алғашқы белгілері пайда болған жағдайда әрбір тұрғын медициналық мекемелерге барып-қоймай, жедел жәрдем шақыруға міндетті.
Аймақ және Петропавл әкімдеріне көрсетілген күндері азық-түлік пен медициналық бұйымдарды сататындарды қоспағанда, ашық ауада жұмыс істейтін қоғамдық тамақтану орындарының, барлық сауда объектілерінің жұмысын тоқтату тапсырылды. Сондай-ақ саябақтардың, скверлердің, туризм, қоғамдық көлік объектілерінің қызметі және халыққа қызмет көрсету орталықтарының жұмысы уақытша тоқтатылады.
Барлық меншік нысанындағы ұйымдар мен кәсіпорындардың басшылары дезинфекциялау құралдарын пайдалана отырып, барлық өндірістік және тұрмыстық үй-жайларды тазалауы қажет.
Сурет: zakon.kz
