Солтүстік Қазақстан облысында коронавирустық инфекциямен ауырғандар санының артуына байланысты алты блокпост қойылды, полицейлер кезекшілікке шықты, деп “ҚазАқпарат” ХАА хабарлайды.
Солтүстік Қазақстан облысы полиция департаментінің баспасөз қызметі алты блокпост екі аудан орталығына қойылғанын түсіндірді. Полицейлерден басқа, тауарлар мен көрсетілетін қызметтердің сапасы мен қауіпсіздігін бақылау бөлімшелерінің мамандары, медицина қызметкерлері мен әкімдік өкілдері коронавирустық инфекцияны таратпау қызметін атқарады.
Мағжан Жұмабаев ауданы Булаев қаласында блокпосттар 9 қазаннан бастап қойылды. Қазір аудан орталығына кіруді бірден 4 блокпост қызметкерлері бақылайды. Мамлют ауданының Мамлютка қаласында да екі блокпост жұмыс істейді. Олар 12 қазан күні сағат 00:00-ден бастап жұмыс істей бастады. Есіл ауданының Явленка ауылында блокпосттар жоқ, бірақ тәртіп сақшылары бұл жерде патрульдеуді күшейтті. Полицейлер қоғамдық тәртіпті қадағалайды, ауыл тұрғындарына карантин шараларын сақтау туралы түсіндіреді: бет перделерді дұрыс кию және әлеуметтік қашықтықты сақтау.
Солтүстік Қазақстан облысы полиция департаменті бастығының бірінші орынбасары, полиция полковнигі Қанат Айтбаевтың айтуынша, шілде айының ортасынан бастап облыс бойынша ҚР ӘҚБтК-нің 425-бабы “Халықтың санитарлық-эпидемиологиялық салауаттылығы саласындағы заңнама талаптарын, сондай-ақ гигиеналық нормативтерді бұзу”бойынша 1547 бұзушылық анықталды. Петропавл аумағында 745 бұзушылық фактісі тіркелді.
Сурет: tengrinews.kz
