Солтүстік Қазақстан облысының әкімі Құмар Ақсақалов келер жылы өңір бюджетінің жартысы әлеуметтік салаға жұмсалатынын айтты. Бұл туралы Солтүстік Қазақстан облысы әкімдігінің баспасөз қызметі хабарлады.
Облыс әкімінің айтуынша, жақында өңірде 2020 жылға арналған бюджет бекітілді, ол 242 миллиард теңгені құрады. Бұл өткен жылдың бюджетіне қарағанда 80 миллиард теңгеге артық.
Ақсақаловтың айтуынша, келесі жылы әлеуметтік салаға жұмсалатын шығындар өткен жылдың осындай көрсеткішімен салыстырғанда 27%-ға ұлғаяды, яғни, әлеуметтік блокқа бюджет қаражатының жартысы кетеді
Сонымен қатар, облыста мәдениет шығындары 37%-ға, спорт шығындары 43,6%-ға артады. Мұндай шығындардың артуы Тұңғыш Президент Нұрсұлтан Назарбаевтың тапсырмасымен және өңірді дамытудың кешенді жоспарымен байланысты.
Солтүстік Қазақстан әкімі келесі жылы мұғалімдердің жалақысы артатынын хабарлады. Ол осы мақсаттарды жүзеге асыру үшін 14 миллиард теңге бөлінетінін атап өтті.
Келесі жылдан бастап өңірде сумен қамтамасыз етуге және Республикалық маңызы бар жолдарға қатысты жобаларды қаржыландыру ұлғайтылатын болады.
Сурет: Inform.kz
