Қазақстан Республикасының сыртқы саясат ведомствосының өкілдері біздің елімізге жақын арада Түмен облысынан гуманитарлық көмек келетінін хабарлады.
ҚР Сыртқы істер министрлігінде хабарлағандай, гуманитарлық жүк біздің республикамыздың Түмен облысындағы құрметті консулы Владислав Квасовтың және Түмен облысы қазақтарының ұлттық-мәдени автономиясының басшысы Есенғали Ыбраевтың бастамасымен Солтүстік Қазақстанға жөнелтілді.
Ізгілік өмек құрамына 20 мыңнан астам медициналық бетперде, 5 мың жұп бір рет қолданылатын қолғаптар, сондай-ақ 500 литрден астам антисептиктер мен дезинфекциялау құралдары бар.
Есенғали Ыбыраевтың айтуынша, коронавирус инфекциясымен күресудің қиын кезеңінде өңірге қолдау көрсету үшін гуманитарлық жүк Солтүстік Қазақстан облысына жіберілді.
Сонымен қатар, автономия төрағасы Солтүстік Қазақстанға ізгілік көмек жинау үшін бір аптадан сәл артық уақыт қажет болғанын айтты.
Бүгінгі күні Солтүстік Қазақстан облысында коронавирус жұқтырудың 2352 жағдайы тіркелді. Ал елімізде олардың жалпы саны 75153-ке жетті.
Сурет: gov.kz
