Ағымдағы жылдың 26-27 қаңтарында Қазақстан Республикасы Премьер-Министрінің орынбасары Роман Скляр бастаған үкіметтік делегация Мәскеуге жұмыс сапарымен барды, деп Премьер-Министрдің ресми сайты хабарлады.
Ресей Федерациясы Үкіметі төрағасының орынбасары Юрий Борисовпен кездесу барысында өнеркәсіптік және ғарыш салаларындағы ынтымақтастықтың кең ауқымды мәселелері қаралды.
Өнеркәсіптік ынтымақтастық тақырыбы Ресейдің өнеркәсіп және сауда министрі Денис Мантуровпен келіссөздерде көрініс тапты. Тараптар уағдаластықтарды, оның ішінде 2019 жылғы 3 сәуірде екі мемлекет басшыларының қатысуымен қол қойылған Қазақстан-Ресей өндірістік кооперациясы саласындағы бірлескен іс-қимыл бағдарламасы шеңберіндегі уағдаластықтарды іске асыру барысын талқылады.
Роман Скляр сапар аясында Ресей Федерациясының көлік министрі Виталий Савельевпен де кездесті. Көлік саласындағы өзара іс-қимылдың, сондай-ақ магистральдар мен Қазақстан-Ресей шекарасы арқылы өткізу пункттерінің инфрақұрылымының ең өзекті мәселелері талқыланды. Кездесуге қатысушылар екіжақты ынтымақтастықты одан әрі нығайту және бірлескен өзара тиімді жобаларды жүзеге асыру бойынша бірлескен күш-жігердің өнімділігін атап өтті.
Сурет: inform.kz
